கதவின் கீல்
ஒவ்வொரு தடவை திறந்து மூடும்போதும்
சத்தமிட்டுக் கொண்டே அன்றாடம்
அரைவட்டத்தில்தான் இயங்குகிறது
அலுவலக லிப்ட்
ஒவ்வொரு தடவை ஏறி இறங்கும்போதும்
சத்தமிட்டது தெரியாமல் இரும்புக் கயிறால்
மேலும் கீழும் ஒரே விதமாய்த்தான் அன்றாடம்
ஏறி ஏறி இறங்குகிறது
கதவின் கீலுக்கு என்ன பணியோ
அந்த இடத்தில்தான் அது இயங்க முடியும்
லிப்டுக்கு என்ன நிர்மாணமோ
அதற்குள்தான் அது இயக்கப்பட முடியும்
கடன் தீர வாழ்கிறோம்
கடமை என்பதே கடன் + மை தானே
சலிக்காதிரு மனமே சுதந்திரம் தேடாதிரு மனமே கசப்பில்லை
நீரில் கொப்புளங்கள் போல் தோன்றிய வாழ்க்கை
பெரும் நீர் வீழ்ச்சியில் சங்கமம் ஆவோம்
யார் புகழ்ந்து யாருக்கென்ன நிகழ்ந்தது அதுவும் ‘குபுக்'தான்
பம்பரத்தை சுற்றிவிட்டு தெருவில் சிறுவன்
வேறு விளையாட்டுக்குப் போவது போல்
இறைவன் இயக்கியதிவ்வுடல் பயணம் .ஆஹா அனுபவி.
