மூச்சிரைக்க மூச்சிரைக்க இலக்குக் கோட்டைத் தொடும் நேரம்
நான்கு ஐந்து பேர் அமுக்குவர் உனைச்சூழ்ந்து !
தெம்பிருந்தால் வா ! அதை விளையாட்டாக விளையாடு
அதுவே “கபடி” கற்றுத் தரும் பாடம்.
ஒரு சிலரை அவுட்டாக்க நொண்டியடித்தாவது முயல்க
உன் மூச்சு இரைக்கும்
அதையும் விளையாட்டாக விளையாடு அது
“நொண்டி” விளையாட்டு பழக்கும் பாடம்
ஏதோ தருவதுபொல் வரிசையாக அமர வைத்து
ஒருவர் முதுகுபின்னே ஒருவர் மறைந்து
எதிர்பாரா நேரத்தில் கிளம்பிவிட்டு “போ!” எனத்துரத்தும்
வாழ்க்கைத் தன்மைதான் “GO GO” விளையாட்டு
உற்றுப் பார்த்தால்
“கீச்சு கீச்சு தாம்பாளம் கியான் கியான் தாம்பாளம்” முதல்
ஒலிம்பிக் கால்பந்து கிரிக்கெட் வரை
ஒவ்வொரு விதமான விளையாட்டிலும்
புதைந்திருக்கிறது ஓர் சூட்சும வஞ்சகப் பயிற்சி
அப்படியிருந்தும் மனிதர் நடுவே
விளையாடுவாயா கடைசி வரை?
முட்டியில் சிராய்க்க அடிபட்டாலும் ஏமாந்தாலும்
சிநேகித்தால்தான் உரசல்களும் விளையாட்டாகும் என உணர்வாயா?
அதுதான் மனித உறவில் இருக்கும் ஒரே கேள்வி!
No comments:
Post a Comment