குழந்தைக்கு கவுன் தைப்பவர்கள்

அந்த
நீல நிற மீன்கொத்திப்பறவை பார்க்கும் தூரத்தில்
காயப்போட்டுள்ளார்கள் அந்த கவுனை
சிற்பிகள்தான் மறு பிறவியெடுத்து
குழந்தைக்கு கவுன் தைப்பவர்கள் ஆகமுடியும்போல

அந்த ஆடையின் வடிவிலேயே
ஒரு
சின்னஞ்சிறு குழந்தையை
எப்படித்தான் செய்கின்றனரோ

அடுத்தமுறை நீங்கள் அறியலாம்
கிளிப் போட்டு
காய வைக்கும்போது
காற்றில்
மேலும் கீழும் பறப்பது
கவுனில் இல்லாத துணிவடிவக்குழந்தைகள் அல்ல
மாயக் குழந்தை ஒன்றின் வீசும் கைகள்!


-- ஆனந்த விகடன் இதழில் வெளியான கவிதை (16.10.2013)