அடிகள்

சிறு வயதில்
சிலேட்டில் தப்பாக எழுதும் எழுத்துக்கு
அடிப்பது அம்மாவின் கைகள் தான்

கணக்கில் ஏறுவரிசை இறங்குவரிசை
தப்பாகச் சொல்லிவிட்டால்
அப்பாவை முந்திக் கொண்டு
அப்போதும் அம்மாதான் முதலில் அடிப்பாள்

பள்ளி விட்டு தாமதமாக வர நேரிட்டாலும்
தங்கையுடன் சண்டை முற்றும்போதும்
நிலவைக் காட்டியும் சாப்பிட மறுக்கும்போதும்
பக்கத்து வீட்டுத் தோட்ட மாம்பழங்கள் திருடியபோதும்
முதல் ஆளாக பல தருணங்களில்
அப்பாவை முந்திக் கொண்டு
அடிக்க கை ஓங்கும் அம்மாவிடம்
காரணம் கேட்டே விட்டேன்

சிறிது வளர்ந்ததும் விளக்கம் சொன்னாள் அம்மா :-
“அப்பா அடித்தால் தாளமுடியாது உன்னால் !
 அதிகம் வலிக்கும் என்பதால் -
முந்திக் கொண்டு நான் அடிக்கிறேன் !
கோபித்து கத்திக்கொண்டே வேகமாய் கை ஓங்கி ஆனால் -
மெல்ல அடித்து உன்னைக் காத்திடுவேன்”


*****